A Asociación Saúde Mental A Creba fixo o peche de ano cunha festa de Nadal á que asistiron máis de 70 das persoas usuarias dos centros de Barbanza (emprazado en Ribeira) e Muros-Noia (con sede en Noia), a localización escollida foi a sede desta entidade na capital barbancesa. Durante o acto festivo, no que se degustaron doces e aperitivos destas datas, aproveitouse para proxectar un vídeo ilustrativo sobre o labor da asociación durante o presente ano.
Dende o equipo da Creba anunciaron que a asociación voltará en 2024 “con máis forza, traballando, como leva facendo desde hai tantos anos, polas persoas con doenzas mentais e defendendo os seus dereitos, sendo deste xeito o altofalante dun colectivo estigmatizado e esquecido”.
O equipo da entidade tamén recordou ademais das persoas que asisten a diario aos centros de rehabilitación psicosocial e laboral, dispoñemos de atención a persoas externas mediante outro tipo de programas sociais, convidando a todas aquelas persoas a informarse sobre os servizos desta entidade e animando á poboación a concienciarse sobre as doenzas mentais.
