“O poder político do e para o pobo. A soberanía reside no pobo. Cada persoa pode pensar e crer no que queira…”. Isto é no que consiste a Democracia. E na democracia constitucional, como a nosa, os xuíces non aplican, senón que interpretan xuridicamente os principios, os valores e os dereitos… .
Nestes días, a Asociación de Xuízas e Xuíces para a Democracia, sinala que “uns oito vocais do Consello Xeral do Poder Xudicial, designados polo Partido Popular, non lles importa embarrar á xudicatura na confrontación política”, en relación coa futura Lei de Amnistía.
Máis de cinco anos, sen querer renovar o CGPJ, e eses oito xuíces conservadores queren seguir as directrices políticas do Partido Popular para impedir unha formación de goberno lexítimo e democrático. Neste sentido a asociación dos xuíces progresistas, sinalan que calquera interpretación sobre esta cuestión unicamente lle corresponde ao Tribunal Constitucional.
En democracia, a separación de poderes é fundamental e cada un deles ten que saber cumprir coas súas obrigas, en cada momento, tanto o executivo, o lexislativo como o xudicial. Nos últimos tempos o CGPJ estano “okupando” uns xuíces, de maneira ilexítima e a pesar diso continúan pretendendo impoñer os seus razoamentos.
