O Concello de Ribeira buscará parcelas adecuadas no centro da cidade para a construción do novo centro de saúde. Estas parcelas deben estar ben situadas e con fácil acceso ao transporte público. Cando se sitúen, ofreceranse a Sanidade para a construción do ambulatorio. Esta proposta foi aprobada no pleno do luns como unha emenda de substitución presentada polos grupos que forman parte do executivo, en oposición á moción presentada polo PP.
A portavoz do PP, María Sampedro, suxeriu impulsar o desenvolvemento urbano do plan Abesadas A, e reservar un terreo para o ambulatorio, mentres que o concelleiro de Sanidade, Juan Luis Furones, mencionou as esixencias do departamento ao solicitar “3.700 metros cadrados de terreo plano, o cal será difícil de conseguir”. Ademais, solicitou máis persoal para cubrir as necesidades do centro. Pola súa badna o alcalde, Luís Pérez Barral, reprochou que a Consellería de Sanidade non respondese á súa solicitude de reunión e, de feito, a emenda aprobada insta o conselleiro a recibilo canto antes, mentres que o concelleiro socialista Francisco Suárez-Puerta esixiu que se corrixan as deficiencias do centro de saúde actual.
