O Concello de Boiro destina 63.050 euros para a promoción do deporte federado no municipio

A xunta de Goberno local do Concello de Boiro celebrada este mércores 15 de novembro deu luz verde ao pago das subvencións por concorrencia competitiva a clubs e entidades deportivas federadas do municipio por un importe total de 63.050 euros. As entidades e clubs que presentaron correctamente a documentación xustificativa recibirán os pagos nos vindeiros días, sinalaron fontes do Concello, que engadiron que o obxectivo destas axudas é “financiar gastos federativos; seguros, salarios e seguridade social; gastos de xestión; gastos publicitarios ou de comunicación; gastos de vestimenta e lavandería; formación, ximnasio, fisioterapia e farmacia; gastos derivados de desprazamentos, hospedaxes, aloxamentos e manutencións; arbitraxes; premios e trofeos; así como outro equipamento deportivo”.

O Concello tamén explicou que esta liña de axudas para clubs e entidade deportivas federadas do municipio encádrase no marco das competencias das entidades locais para o fomento de actividades deportivas e lúdicas e apoiar a participación dos clubs en ligas ou competicións oficiais de ámbito comarcal, provincial, autonómico ou estatal nas distintas modalidades deportivas.

“O Concello de Boiro fai unha gran aposta polo deporte no concello con subvencións nominativas, bolsas a deportistas e tamén estas axudas a clubs deportivos que promoven a práctica de deporte federado”, recoñeceu o concelleiro de Deportes, Marcos Fajardo.