O peche da cafetaría da estación de autobús da Pobra do Caramiñal, que deixou a instalación sen servizo de iluminación, limpeza e acceso aos baños, o que motivou as queixas das persoas usuarias do transporte público, fixo que o Concello da Pobra do Caramiñal comunicase á Consellería de Infraestruturas e Mobilidade -ente con competencia nesta instalación- a súa preocupación polo deterioro na calidade de servizo da estación. Tamén motivou que entrementres a Administración local asumira a recollida do lixo.
O alcalde, José Carlos Vidal, e a concelleira da Mobilidade, Rosana Pérez, mantiveron neste 2 de novembro un encontro coa xefa do Servizo das Infraestruturas da Dirección Xeral da Mobilidade, Tamara Subiela, para solicitar o restablecemento dos ditos servizos, “pois son as necesidades máis urxentes”, explicaron Pérez e Vidal. Adquiriuse o compromiso de solucionar todo isto, ademais de incrementa-la sinalización.
Outras das intervencións que o Concello considera que a Xunta de Galicia debe efectuar no recinto son “a mellora da incorporación á estrada dos autobuses, avanzar en materia de accesibilidade e buscar unha alternativa para reforza a pérgola co obxectivo de incrementar a protección cara ás inclemencias meteorolóxicas”.
