Un ano máis a empresa muradá Fresco y del Mar convértese en abandeirada do movemento anti-Black Friday do sector do mar galego. Faino a través da campaña Únete ao Blue Friday, que cumpre este ano a súa cuarta edición e convértese en punta de lanza doutras iniciativas semellantes e análogas. Este venres 24 de novembro a empresa interromperá unha vez máis a actividade comercial da peixaría en liña, que porá o cartel de pechado en sinal de protesta. Faro baixo o seguinte lema estendido: Os nosos mares non celebran o Black Friday. Nós tampouco, e ti? Únete ao Blue Friday.
A campaña vira ao redor dunha frase (Se o mar tivese un prezo…) sobre a que Fresco y del Mar reflexiona: “Quizais 700 sería o xusto… como o número de especies mariñas ameazadas polo plástico neste preciso instante. Ou poida que haxa que axustar a cifra a un número máis alto, poñamos 3.900… como as toneladas de plástico vertidas este ano só no noso Océano Atlántico”.
E engade a empresa: “Sexamos atrevidos, ascendamos a cifra e redondeemos a 100.000…como o número de animais mariños que morren por mor do plástico cada ano. Ou, se realmente valoramos os nosos mares, o xusto sería situar o prezo ao redor dos 12.700.000… como as toneladas de lixo que anualmente pasan a formar parte dos océanos”, engade a empresa.
Dende Fresco y del Mar explican quen “en realidade, o valor dos nosos mares é incalculábel. A destrución dos mesmos si ten cifra e vai en aumento. Por iso non participamos da espoliación consumista dos océanos nin do consecuente proceso de basurización dos mesmos. Os nosos mares non celebran o Black Friday”.
A campaña calou tamén noutros negocios de Muros e no propio Concello, que lanzou a súa para pedir un comercio responsábel. “Durante todo o ano somos fieis á nosa filosofía, que defende a pesca galega artesanal, a prezos xustos e sustentábeis. Non podemos botar pola borda o traballo de todo o ano nunha xornada de consumismo barato”, explica Milucho Louro, portavoz de Fresco y del Mar, engadindo que “ademais de todo isto, o 5% das nosas vendas desde hoxe e ata o xoves, 23 de novembro, serán destinados a Cáritas Muros, unha iniciativa que xa realizamos en anos anteriores”
A compañía, que só traballa con profesionais que practican o marisqueo e a pesca artesanal e sustentábel na Costa da Morte e a ría de Muros, é líder na venda en liña de peixe e marisco fresco galego en toda España.
