A concelleira de Medio Ambiente, Olga González, participou esta tarde na xornada de entrega e formación dos composteiros a 40 novas vivendas unifamiliares participantes no programa de Compostaxe Doméstica. Con esta nova entrega son xa máis de 300 as familias que participan neste programa.
“Cada vez son máis as persoas que solicitan un composteiro e que participan neste programa, favorecendo a redución de emisións de dióxido de carbono e o uso de fertilizantes químicos”, afirmou a concelleira. A experiencia do seguimento que se leva a cabo destes composteiros amosa que a maior parte dos residuos que se depositan son de materia sobrante da cociña, seguido de segaduras de horta. O uso deste sistema permite un aforro na xestión dos residuos de entre 600 e 800 litros de desperdicio
orgánico por familia.
Para a adquisición destes composteiros o Concello de Boiro conta cunha subvención da Consellería de Medio Ambiente, Territorio e Vivenda para o financiamento de actuacións en materia de biorresiduos de competencia municipal, cofinanciadas polo fondo europeo relativo ao Mecanismo de recuperación e resiliencia da UE no marco do Plan de recuperación, transformación e resiliciencia, financiado pola Unión Europea-NextGenerationUE.
O obxectivo deste programa é avanzar na familiarización da compostraxe de cara á implantación do contedor da quinta fracción e
lograr unha xestión máis sostible do lixo. “De cara a finais deste ano vai comezar a implantación do quinto contedor para os residuos orgánicos, o uso de composteiros vainos axudar concienciar e que esa transición sexa moito máis sinxela”, recoñeceu Olga González. Todas aquelas persoas que se queiran inscribir no programa de Compostaxe Doméstica do Concello de Boiro poden facelo a través do departamento municipal de Medio Ambiente, no enderezo electrónico
medioambiente@boiro.org ou no teléfono 981 377 585.
