A concelleira María Outeiral participou esta tarde na primeira xuntanza do programa de intercambios lingüísticos que leva a cabo o
Concello de Boiro. O obxectivo desta proposta é formar grupos de conversa entre persoas de distintas nacionalidades para aprender a lingua, cultura e costumes dun país.
Hai preto de vinte persoas inscritas nestes intercambios e vanse crear pequenos grupos de conversa en función das preferencias. Neste momento están confirmados os grupos de alemán e inglés pero tamén hai propostas para francés ou portugués. “Neste momento comezamos con inglés e alemán pero o obxectivo é ir creando grupos con preferencia doutras linguas en función da demanda”, recoñeceu a concelleira.
A proposta xorde dos equipos de normalización e dinamización lingüística de centros educativos e de estudantes de Erasmus que buscan aprender galego e español ademais de compartir a súa lingua con aqueles que desexan reforzar, practicar ou aprender outros idiomas. “O obxectivo destes intercambios é aprender unha lingua dunha forma dinámica e entretida, compartindo unha conversa cotiá”, afirmou María Outeiral.
Os distintos grupos reuniranse luns e martes e aínda hai prazas dispoñibles para aquelas persoas que queiran participar nos intercambios lingüísticos do Concello de Boiro.
