Este xoves é o Día Internacional do Patrimonio e as entidades galegas están a conmemoralo con actividades diversas. Unha destas entidades é a Comunidade de Montes de Baroña (Porto do Son), que vai celebrar unha xornada ambiental este sábado 18 de novembro. A xornada inclúe varias iniciativas complementarias, a primeira das cales é unha xeira de traballo colectivo para mellorar a contorna de San Tomé. Será, na compaña da veciñanza voluntaria que queira participar, a partir das 10.00 horas (con saída a esta hora do Local da Comunidade de Montes). As inscricións para este traballo cómpre formalizalas no teléfono 679 156 855.
O mesmo sábado 18 de novembro celebrarase ademais a cuarta edición da Xornada sobre o Patrimonio Inmaterial de Baroña. Nela, a través das persoas maiores de Baroña, ilustraranse e recuperaranse historias, lendas, contos ou rumores sobre a parroquia, a súa xente, os seus lugares ou as cantigas que versaban sobre ela.
A maiores, haberá un obradoiro de xoguetes tradicionais e habilitaranse xogos populares para a rapazada. Tamén está previsto un taller de elaboración de filloas da sartaña, “para que a veciñanza que queira poida aprender a facer o amoado e practicar a arte de facer filloas no filloeiro”. A maiores, para recuperar forzas, haberá unha degustación de produtos típicos e unha foliada libre para todas as persoas que acudan á xornada e se animen a tocar, cantar e bailar. Estas actividades celebraranse a partir das 17.00 horas no Local da Comunidade de Montes de Baroña. Quen precise máis información pode chamar ao número 679 156 855.
