Este mes de novembro o Concello de Porto do Son compartiu máis novidades relativas ao seu proxecto de recuperación ambiental costeira que inclúe, como temos sinalado dende este medio, a creación dunha senda litoral que percorra a totalidade do concello, dende Miñortos (no límite con Noia) até Seráns-Espiñeirido (no límite con Ribeira). Contará cunha trintena de quilómetros. O obxectivo deste ambicioso proxecto é “pór en valor unha ruta moi transitada por veciños e visitantes, de gran interese ambiental, paisaxístico e turístico”. O Concello explicou que se ben xa hai moitos treitos litorais completados, hai outros “puntos críticos” nos que cómpre traballar. Por exemplo no treito comprendido entre a praia do Pozo e Aguieira e noutros tramos da zona de Caamaño e Baroña. O vindeiro investimento, con fondos europeos, será entre a praia de Fonforrón e a pasarela da Arnela.
Trátase de dous puntos que xa foron obxecto de intervencións (na Arnela construíuse unha pasarela para permitir aos viandantes transitar de xeito seguro sen percorrer a beiravía da estrada, e Fonforrón e O Preguntoiro estrearon cadanseus miradoiros). O obxectivo do Concello é permitir que veciños e visitantes poidan empregar unha senda peonil segura dende a vila sonense até o Castro de Baroña. Esta senda, para cuxa materialización só resta a aprobación de Costas, conectará Xío até A Arnela. Contará cun beiril (voladizo) peonil que discorrerá de xeito paralelo (exterior) á beira, ao mesmo nivel. Terá 1,6 metros de ancho. Con esta intervención búscase solucionar o problema de seguridade e accesibilidade que presentan as beiras previamente habilitadas, que son moi estreitas.
Dende Miñortos até Espiñeirido
“Queremos ser capaces de achegar unha senda segura e accesíbel que permita á xente comezar a percorrer o noso concello nun extremo, en Miñortos, e rematar noutro, en Espiñeirido, e sen deixar esa ruta”, comentou recentemente o rexedor Luis Oujo en declaracións a Canal Barbanza, engadindo que ao abeiro deste proxecto reivindicaranse tamén os camiños tradicionais.
