Este 22 de novembro formalizouse a sinatura do convenio para a celebración do oitavo Certame de Curtas Alberto Romero, festival da nosa comarca que leva o nome do escritor, divulgador, comunicador e dinamizador cultural palmeirán, cuxo prazo de presentación de contribucións abriu o 1 de outubro e pecha o 28 de febreiro do ano vindeiro. Participaron no acto o presidente da Mancomunidade, José Ramón Romero; o alcalde de Rianxo, Julián Bustelo; alcalde da Pobra do Caramiñal, José Carlos Vidal; a concelleira de cultura de Ribeira, Antía Alberte e a xerente da Mancomunidade Barbanza Arousa, Fátima Cachafeiro. En representación da Asociación Cultural Alberto Romero participou Santiago García.
Segundo sinalaron, o Certame de Curtas Alberto Romero constitúe “un exemplo claro da aposta deste territorio pola posta en valor dos proxectos creativos de tódalas idades e que conta con moi boa acollida entre o público en xeral”. Nel participan nenas e nenos dende Primaria ata rapazas e rapaces de Bacharelato, ademais de dispoñer dunha categoría para usuarios dos centros de diversidade funcional e outra categoría libre, aberta a todos aqueles que queiran participar.
Así mesmo, este ano conta novamente coa categoría de premios Barbanza Arousa, aberta a todos os públicos e a toda Galicia e na que se van propoñendo temáticas no eido turístico e de valorización do territorio. Esta categoría implantouse o ano pasado con contidos relacionados co Camiño de Santiago e, desta volta, abrangue a temática da enogastronomía, na que se inclúen os oficios relacionados coma a pesca, marisqueo, conserva ou viticultura. Segundo explicaron os responsábeis de Barbanza Arousa, esta temática atópase na liña de desenvolvemento do Plan de Sustentabilidade Turística da Mancomunidade, que se denomina Viaxe a Través dos Sabores, mediante a cal faise unha aposta por consolidar no eido turístico os viños da IXP Terras do Barbanza e Iria así coma o produto do mar, tanto fresco coma en conserva.
“Este convenio supón para a mancomunidade un fito máis na aposta pola profesionalización e mellora do eido cultural así coma a consolidación do turismo cultural e creativo coma unha forma de posicionamento do territorio”, salientou José Ramón Romero, presidente da entidade supramunicipal do Barbanza e alcalde de Boiro.
