A Mancomunidade Barbanza Arousa, formada polos concellos de Ribeira, A Pobra do Caramiñal, Boiro e Rianxo, participou no encontro internacional Sustentabilidade, Turismo e Innovación en Valencia. Fátima Cachafeiro, xerente da Mancomunidade, formou parte dunha mesa redonda; xunto con representantes da Deputación de Segovia, concello de Alcoy e o concello de Torrent entre outros. Expuxo o modelo de gobernanza turística que se está a levar a cabo na entidade e que é clave para o desenvolvemento turístico do destino.
Afondou tamén nos ambiciosos obxectivos do ente entre os que destacan a desestacionalización, o incremento da pegada económica por turismo e o posicionamento como destino enogastronómico e xacobeo de referencia. Asemade, puxo o foco na estratexia para a consecución dos mesmos, baseada “na colaboración público-privada, dando voz aos axentes do sector para o seguimento dos proxectos, así como a definición e execución de actuacións de forma cooperativa”. Exemplos coma as mesas de traballo para a elaboración da estratexia para concorrer ao Plan de Sustentabilidade Turística ou a implantación de distintivos de calidade son algunhas das iniciativas levadas a cabo neste senso, dixo.
