A Fundación Catedral de Santiago continúa co seu proxecto de difusión do patrimonio musical que se custodia no Arquivo Capitular. Nesta ocasión, o músico galego Joam Trillo realizou a transcrición e edición crítica do Libro de órgano de Joaquín Sánchez, un dos tres libros de órgano que se conservan no Arquivo Musical da Catedral de Santiago. Aínda que non se sabe exactamente como chegou á catedral, este caderno está datado en 1769. É posible que o trouxera de Madrid Melchor López, xunto cos outros dous libros de órgano que existen, porque, certamente, non foi o propio Joaquín Sánchez o que deixou o seu libro en Santiago, pois non consta que el estivese nunca nesta catedral. A esta nova publicación incluíronselle en apéndice as sonatas que se conservan no Real Conservatorio Superior de Música de Madrid, por iso recibe o nome “Obra completa para tecla. Libro de órgano e sonatas”. O volume pódese adquirir as Tendas da Catedral.
A publicación deste libro súmase á colección de cinco discos editados nos últimos meses e que conforman a serie “A música da catedral de Santiago”, tamén dispoñible nas tendas da catedral, e nas principais plataformas de música en liña. De feito, as obras do Libro de Joaquín Sánchez graváronse para o volume IV da colección, na Catedral de Segovia coa colaboración do organista Roberto Fresco. Elixiuse o instrumento da sede segoviana pola similitude co instrumento da sede compostelá no século XVIII.
