O Concello de Porto do Son impulsou esta semana unha manchea de actividades co gallo da celebración do 25N (Día para a Eliminación da Violencia contra as Mulleres). Unha destas actividades é a representación da peza teatral xuvenil O pequeno poni, de Redrum Teatro Compañía. Será este mércores ás 12.00 horas na Casa da Cultura de Porto do Son. Está convidada a participar a mocidade de cuarto da ESO e primeiro de Bacharelato.
A obra ponnos na pel de Luismi, un neno de dez anos que vai a clase cunha mochila da súa serie de debuxos preferida, O meu pequeno poni. Algo tan inocente esperta as burlas, vexacións e a violencia máis brutal dos seus compañeiros. Esta é unha obra sobre o acoso escolar, esa dolorosa realidade na que viven atrapados cada vez máis nenos e nenas de todo o mundo; unha reflexión acerca da liberdade, o medo e o instinto de protección; un retrato da cegueira, a ineptitude e os prexuízos sociais dos adultos.
Esta obra está inspirada nos feitos reais que tiveron lugar en Estados Unidos durante o ano 2014.
Máis actividades do 25N en Porto do Son
O Concello de Porto do Son programou actividades para desenvolver en diferentes puntos do municipio con motivo do 25N, Día para a Eliminación da Violencia contra as Mulleres. A axenda comezou este 20 de novembro no IES de Porto do Son cunha charla informativa sobre agresións sexuais para o alumnado de 3º da ESO. Prosegue na mesma xoranda cun escape room no CEIP de Xuño, para o alumnado de Primaria.
Como dixemos, este 22 de novembro o programa continúa co espectáculo teatral O Pequeno Poni, de Redrum Teatro, a partir das 12.00 (na Casa da Cultura do Son para alumnado de 4º da ESO e 1º de Bacharelato).
O 25 de novembro celebrarase un curso de Aquagym (Soom Management) na Piscina Municipal. Será unha actividade aberta a toda a veciñanza. Levarase a cabo de 10.00 a 13.00 horas. As inscricións cómpre facelas na Piscina (até o 22N) ou chamando ao 604 051 189.
O programa rematará cun curso de defensa persoal (Escuela de Boxeo El Canario) para o alumnado de primeiro de Bach. Será no IES Porto do Son, os días 29 e 30 de novembro e o 1 de decembro.
