O alcalde de Ribeira, Luís Pérez, compareceu este venres 6 de outubro para valorar o establecemento dunha liña de bus que conectará O Barbanza cos hospitais de Santiago; segundo o anuncio da Xunta de Galicia esta semana. Compareceu na compaña dos veciños do concello Fran Torrado e Mari Pena, quen sinalou que se trata dunha demanda que se lle vén achegando ao Goberno autonómico dende hai dous anos, “a través da mancomunidade”. Pola súa parte, o rexedor afirmou que “dende o Concello de Ribeira acompañouse esta reclamación porque consideramos que era necesaria para mellorar o servizo de transporte público”.
O alcalde congratulou a tódalas persoas que reivindicaron este servizo e agradeceu o seu traballo de concienciación social.
Luís Pérez tamén destacou a problemática situación das liñas regulares dende a comarca ata Santiago de Compostela e co transporte escolar. “Vemos incumprimentos flagrantes coa empresa concesionaria do servizo público de transporte e dende o Concello estamos mantendo a vixilancia a través dos efectivos da Policía Local”. Segundo explicou, estanse a levantar actas con tódolos incumprimentos rexistrados co propósito de reclamar solucións á Xunta de Galicia, autoridade competente en materia de transporte.
“Necesitamos que a Consellería abra expedientes sancionadores, no caso de ser necesarios, para que o transporte público na nosa comarca funcione de xeito correcto,”, sinalou, engadindo que o Concello está a traballar con Monbus para mellorar as liñas regulares no municipio, o transporte escolar e tamén a conexión con Santiago. “Seguiremos velando por que se cumpra o servizo acordado”, concluíu.
