A Plataforma Stop Deshaucios Barbanza compartiu esta semana a situación delicada pola que está a pasar unha parella de Noia que vive en serio risco de quedar na rúa e sen solución firme e estábel de tipo habitacional. A plataforma fixo saber que a familia vive pendente dunha data de desafiuzamento fixada polo Xulgado número 1 de Noia para o día 14 de decembro. O fogar, lembran dende Stop Deshaucios, está composto por un matrimonio de pensionistas sobre os que pende unha execución hipotecaria interposta polo Grupo Inmobiliario Global Pantelaria.
A familia atópase en seria situación de vulnerabilidade xa que un deles só cobra unha pequena pensión e o outro cónxuxe non percibe ningún tipo de prestación, e que están defendidos por unha avogada de oficio. Desde a Plataforma Stop Desafiuzamentos está a negociarse coa entidade inmobiliaria, de acordo co estipulado na Lei 1/2013, o Código de Boas Prácticas e a nova Lei de Vivenda un Alugueiro Social, para que a familia poida continuar na vivenda habitual.
