Os municipios da Burela, A Illa de Arousa, Oleiros, Porqueira e Sanxenxo son galardoados por primeira vez e os de Alfoz, Cervo, Curtis, A Laracha, Moaña, Mondoñedo, Muros, Ordes, Outeiro de Rei, Parada de Sil, Porto do Son, Ribeira e Sober revalidan este distintivo
A Xunta reafirma o seu compromiso co fermosismo coa concesión da Bandeira Verde de Galicia a 18 concellos e coa inclusión no proxecto de orzamentos do vindeiro ano dunha partida de 2 millóns de euros para a concesión de axudas para corrixir impactos paisaxísticos. Así o subliñou a vicepresidenta segunda e conselleira de Medio Ambiente, Territorio e Vivenda, Ángeles Vázquez, durante o acto de entrega destes distintivos que tivo lugar, hoxe, na localidade ourensá de Porqueira.
Logo de lembrar que este distintivo ten por obxecto enxalzar as boas prácticas ambientais e de protección e conservación da paisaxe, a vicepresidenta segunda, que estivo acompañada do delegado territorial da Xunta en Ourense, Gabriel Alén, salientou que cada vez son máis os concellos que se suman a esta iniciativa. Se na súa primeira edición -2020- se entregaron 2 bandeiras verdes, este ano son 18 os municipios distinguidos, 3 máis que o pasado 2022.
Nesta ocasión, os concellos de Burela, A Illa de Arousa, Oleiros, Porqueira e Sanxenxo son galardoados por primeira vez e os de Alfoz, Cervo, Curtis, A Laracha, Moaña, Mondoñedo, Muros, Ordes, Outeiro de Rei, Parada de Sil, Porto do Son, Ribeira e Sober revalidan este distintivo que outorga visibilidade a estes municipios como territorios responsables.
Nesa liña, a vicepresidenta segunda animou a todos os municipios a presentarse a este galardón que pretende sumar e reflectir o esforzo que as entidades locais están facendo polo futuro de Galicia, grazas a accións e boas prácticas para ordenar o territorio, protexer o medio ambiente e a paisaxe; para afrontar o cambio climático e mellorar a eficiencia enerxética; para xestionar de xeito responsable os residuos municipais, e para sensibilizar a cidadanía nesta materia.
A maiores, a concesión deste recoñecemento supón, ademais, un mérito para a obtención de subvencións en materia de patrimonio natural. E, como novidade desta edición, tamén para a obtención de axudas autonómicas en materia de residuos para construír e mellorar puntos limpos fixos, implantar instalacións móbiles ou impulsar proxectos de preparación para a reutilización.
Durante a súa intervención, Ángeles Vázquez incidiu en que o Goberno galego manterá en 2024 a súa aposta polo fermosismo e a protección da paisaxe. Así, o Instituto de Estudos do Territorio (IET) disporá dun orzamento de preto de 5,7 millóns de euros, dos que 2 millóns de euros se destinarán á convocatoria de axudas para a corrección de impactos paisaxísticos.
Cómpre lembrar que desde a posta en marcha desta iniciativa, en 2021, a Xunta apoiou a máis dun cento de entidades locais e a 1.850 particulares con 7,6 millóns de euros para a execución de obras e actuacións que contribuíron a fomentar a cultura do fermosismo.
A vicepresidenta segunda e conselleira de Medio Ambiente, Territorio e Vivenda participou no acto de entrega destes distintivos en Porqueira
