O alcalde de Ribeira, Luís Pérez, a concelleira de Servizos Municipais, Tania Redondo, e o segundo tenente de alcalde, Francisco Suárez Puerta visitaron este luns 30 de outubro as obras de acondicionamento do novo estacionamento gratuíto en Fafián, ao carón do Cemiterio Municipal. Segundo indicaron, a parcela abrangue 5.800 metros cadrados, “a máis grande habilitada até o de agora”, e terá iluminación e un pavimento de grava grosa que evitará a acumulación de auga nos día de choiva ou de po nos días secos.
“Nunha primeira fase e co propósito de acondicionar o aparcadoiro para Defuntos habilitaranse unhas 250 prazas para que a veciñanza poida estacionar preto do cemiterio pero nunha fase posterior poderá chegar ás 1.000 prazas” explicou o alcalde Luís Pérez. Así mesmo destacou que dende o Concello estase a facer “un esforzo para acondicionar máis aparcadoiros gratuítos en Ribeira” e “para municipalizar o parking do Centenario, que terá unhas tarifas moi reducidas”.
A concelleira Tania Redondo, agradeceu aos traballadores o seu esforzo para acondicionar as prazas “que estarán dispoñíbeis desde este martes 31 mesmo para que a veciñanza poida usalas no día de Defuntos e no día de Todos os Santos.”
