O porto de Rianxo nunha imaxe de obaixoulla.gal
Portos de Galicia colaborou co sector portuario de Rianxo para acadar un proxecto de remodelación e ampliación de prazas de amarre que satisfixera a todas as partes implicadas. Nunha reunión de traballo do presidente do ente público, José Antonio Álvarez, cos representantes da confraría de pescadores, bateeiros e Concello, acordouse de maneira conxunta dar trámite á proposta de Portos de Galicia que contempla prazas de amarre en peirao flotante para o total da frota que opera a día de hoxe na localidade.
O presidente de Portos remarcou que “desde o ente público traballouse durante meses na avaliación de varias alternativas técnicas para ampliar as instalacións de amarres de Rianxo”. Inicialmente, engadiu, estas alternativas “estiveron baseadas no cambio de localización das instalacións náutico-recreativas, que estaba a tramitar o club náutico”. O presidente tivo que remodelar a proposta, adaptándoa á configuración actual do porto ante o recente desistimento do club en relación ao traslado.
A proposta final contempla prazas de amarre para os preto de 300 usuarios actuais desta instalación “recolocando as embarcacións nas prazas máis axeitadas para as súas características”, explicou Álvarez, engadindo que “o novo emprazamento da frota permitirá a eliminación dos amarres ao peirao”.
