O vindeiro día 27 de outubro o Pazo de Rianxiño acollerá unha xornada de portas abertas destinadas a permitir que a veciñanza e os visitantes poidan comprobar as melloras ambientais, naturais e decorativas realizadas na contorna do inmóbel polo alumnado do Obradoiro de Emprego posto en marcha polo Concello.
Realizaranse visitas guiadas polo propio alumnado (que porán o foco na recuperación dos xardíns e nas zonas verdes da fortaleza) e unha pequena exposición fotográfica dos cambios realizados.
O horario será de 10.00 h a 12.00 h.
Como dixemos, os traballos de posta a punto foron realizados polo alumnado participante no Obradoiro Dual de Emprego Pazo de Rianxiño, impulsado polo Concello para fomentar a formación cualificada e a ocupabilidade no termo municipal. Os participantes tamén traballaron recentemente na mellora, a limpeza e o mantemento da senda litoral rianxeira.
Por certo que Rianxo contará en breve con outro obradoiro de emprego, Monte Noso. De feito, o Concello de Rianxo vén de recibir 398.284,65€ da Consellería de Promoción do Emprego e Igualdade para a posta o funcionamento desta nova iniciativa que permitirá formar a 15 alumnos/as traballadores/as nas especialidades de repoboacións forestais e tratamentos silvícolas, así como en actividades auxiliares de conservación e mellora de montes. Prevese que o obradoiro bote a andar a comezos de novembro e en vindeiras datas publicarase a convocatoria de selección do persoal de formación, así como a solicitude de alumnado.
