O Concello de Boiro recibiu da Consellería de Promoción do Emprego e Igualdade unha subvención por importe de 531.046,20 euros para a realización da nova edición (a terceira) do Obradoiro Dual de Emprego Medioambiental Torre de Goiáns. A formación é de nivel 2 e está destinada a 20 alumnos e alumnas e será de un ano de duración. Estará dividida en dúas especialidades con 10 alumnos/as en cada unha.
O Concello explicou que por unha banda vaise impartir a especialidade de Instalación e mantemento de xardíns e zonas verdes e pola outra a de Repoboacións forestais e tratamentos silvícolas. O alumnado contará cun contrato de traballo para formación e aprendizaxe a tempo completo de 40 horas semanais cun horario de 7.30 a 15.30 horas durante 12 meses.
As persoas participantes formarase de xeito teórico e tamén práctico con actuacións a desenvolver en materia de prevención de incendios forestais en monte Peón e monte do Sino, na zona verde dos castros de Neixón, no Camiño A Orixe (tarefas de conservación e valorización), no Pazo de Goiáns (mantemento e conservación da zona verde), Polígono de Espiñeira (axardinamento das rotondas de acceso), no parque da Cachada (axardinamento e mellora paisaxística) na céntrica praza de Galicia (acondicionamento dos xardíns).
Fontes do Concello engadiron que para participar neste obradoiro é preciso que as persoas candidatas estean insritas como demandantes de emprego na Oficina de Emprego e solicitar ‘taller de emprego’. Ademais do alumnado traballador, vaise contratar persoal docente para o desenvolvemento do programa formativo. Contratarase a un director/a, un técnico forestal, un docente titor e dous docentes. Os procesos selectivos para o profesorado publicaranse na web municipal (www.boiro.gal) no apartado Procesos Selectivos.
