Ruth Beltrán inaugurou este xoves 5 de outubro, no Centro Social de Boiro, a mostra Madeiras do Mar, que se poderá visitar no segundo andar do centro durante o mes de outubro. A concelleira de Cultura, María Outeiral, acompañou á autora na inauguración da proposta artística, que xorde do proxecto Madeira Zombi, nado hai tres anos para, entre outras cousas, recuperar madeiras abandonadas para dotalas dunha nova vida a través da súa conversión en arte.
As crebas que compoñen esta mostra están recollidas nas praias e nas rochas, son madeiras que tiveron antes unha vida útil vinculada a oficios e paisaxes.
A mostra recolle imaxes de embarcacións, industrias, oficios ou da propia vida mariña que se transfiren a pezas de madeira. Madeiras do Mar busca tamén ser unha homenaxe á tradición mariñeira e ás historias de persoas ou empresas que, co seu esforzo vital, fortaleceron o vínculo de Galicia co mar.