A Mancomunidade Barbanza Arousa, o Concello de Rianxo, o Club de Atletismo de Rianxo e a Deputación da Coruña convocaron a novena edición dun dos acontecementos deportivos máis relevantes deste outono no panorama comarcal e galego: a Carreira Popular Concello de Rianxo, proba pertencente ao Circuíto de Carreiras Barbanza Arousa e ao IX Circuíto Provincial de Carreiras Populares da Deputación da Coruña. Será o 1 de novembro a partir das 16:30 h, con saída na praza de Castelao, en Rianxo. As persoas interesadas en formalizar a súa inscrición ou recadar máis información poden visitar a web da Mancomunidade.
A proba abéirase ao Circuíto de Carreiras Barbanza Arousa (4 carreiras, 1 meta), un programa anual de eventos que fomenta a práctica da actividade deportiva na natureza ao mesmo tempo que se coñecen os recursos e paisaxes do destino Barbanza Arousa. Está promovido e organizado de maneira colaborativa entre a Mancomunidade Barbanza Arousa e as concellerías de deportes de A Pobra do Caramiñal, Boiro, Rianxo e Ribeira.
As inscricións na IX Carreira Popular Concello de Rianxo rematan o domingo 29 de outubro ou ao completarse a cota de prazas dispoñíbel.
Como dixemos, a proba está incluída no Calendario Oficial da Federación Galega de Atletismo e nos seguintes circuítos:
- IX Circuíto Provincial de Carreiras Populares, promovido pola Deputación da Coruña.
- VI Circuíto Carreiras Populares Barbanza Arousa, promovido e organizado polos Concellos que forman parte da Mancomunidade Arousa Norte:Boiro, Rianxo, A Pobra do Caramiñal e Ribeira.
