A asociación inclusiva da nosa comarca Amicos celebrou este sábado 21 unha xornada de portas abertas. A actividade reuniu máis de 70 persoas na súa sede de Comoxo, Boiro. Entre os asistentes atopábanse socios, familias, empresas, persoal educativo, etc. Durante dúas horas, as e os participantes puideron coñecer de primeira man as instalacións e os servizos cos que conta o centro acompañados de Pilar Sampedro, responsábel de centros da asociación, e Sonia Fuentes, coordinadora de centros.
O evento, que comezou sobre as 11:30 horas, consistiu nun percorrido polas instalacións no que as persoas participantes puideron ver de xeito directo como funcionan o espazo de rehabilitación avanzada e a aula de estimulación, coñecer o traballo que realizan as áreas de Emprego e Transformación, e realizar distintas actividades para coñecer en profundidade a actividade do centro.
Durante a estadía na sede de Amicos en Comoxo as e os visitantes tamén puideron implicarse nun obradoiro centrado nos servizos que ofrecen a Unidade de Atención Temperá e o Centro de Educación Especial, situados ambos na Escola de Educación Especial que a asociación ten en Oleiros, Ribeira.
Tamén realizaron un obradoiro no que traballar a expresión a través da música e a pintura, e un xogo interactivo de preguntas no que puideron poñer a proba os novos coñecementos sobre a asociación Amicos.
Debido ao éxito de participación, os asistentes foron divididos en dous grupos conducidos por Pilar Sampedro, responsábel de centros da asociación, e Sonia Fuentes, coordinadora de centros, para realizar o percorrido. Este rematou coa proxección dun vídeo para coñecer os espazos que non se puideron ver durante a visita para salvagardar a privacidade dos residentes do Fogar Amicos. A xornada finalizou sobre as 13.30 horas cun aperitivo elaborado e servido polo equipo Ñam Ñam de Amicos, que contou con Yassin e Manuel, residentes do Fogar Amicos, como camareiros. Foi entón cando os asistentes puideron compartir as súas dúbidas e preguntas de forma distendida co equipo da asociación.
