O mal tempo non impediu que esta fin de semana se celebrase en Froxán, en Lousame, o 1º “Bioblitz” que organiza Montescola coa colaboración da Deputación da Coruña e o apoio da Asociación Galega de Custodia do Territorio.
Un “bioblitz” é unha especie de maratón de biodiversidade no que as participantes deben localizar e identificar tantas especies como sexa posíbel nun espazo determinado, neste caso a Área Conservada de Froxán, que em 2017 foi recoñecida polo Programa das Nacións Unidas para o Ambiente como unha das “Áreas Conservadas por Pobos Indíxenas e Comunidades Locais” (ICCA, nas súas siglas en inglés).
No venres achegáronse a Froxán medio cento de estudantes de arquitectura da paisaxe da Escola Politécnica Federal de Zúrich que exploraron o territorio nunha visita de campo facilitada pola Fundación Ría mentres que no sábado a xornada adicouse á identificación de especies, localizándose varias das incluídas no Catálogo Galego de Especies Ameazadas, como o musgo luminoso (Schistostega pennata), o morcego de ferradura (Rhinolophus ferrumequinum) ou unha especie rara de fento (Dryopteris guanchica).
As participantes puideron aprender a utilizar a aplicación de ciencia cidadá iNaturalist, de acceso libre e gratuito, que utilizada algoritmos de intelixencia artificial para facilitar a identificación das especies, observacións que logo son validadas por unha comunidade de máis de 3 millóns de usuarias.
Na xornada identificáronse dúas novas poboacións de musgo luminoso, especie protexida e con presenza escasa, nunha parcela da Fundación Montescola adquirida co apoio da Deputación da Coruña. A parcela forma parte dun proxecto de restauración ambiental máis amplo que busca conservar e por en valor o espazo natural da contorna da Área Conservada de Froxán.
