Ver significa “percibir” a través da vista. Vemos grazas á luz. Se tes os ollos abertos, entón percibes, ves, o que está diante dos teus ollos.
Mirar, en cambio, é dirixir a vista, os ollos, nunha dirección ou cara a un obxecto.
Vemos un oviño insignificante do tamaño da uña do teu dedo maimiño, poderiamos tiralo, pisalo ou ignoralo e deixar seguir o seu camiño, o que hoxe vemos é un pequeno ovo, pero non sabemos que será mañá se deixamos que siga o curso da vida.
Ese ovo mañá será unha eiruga, nada para uns e fermoso para outros, máis tarde converterase nunha crisálide, nada que nos diga, ou mostre interese, pero non sabemos que dese crisálide sairá unha fermosa bolboreta, que nos chamara a atención.
Con isto quero dicir que observamos a un neno duns 10 anos, tímido, retraído, ou un mozo de 16 anos, mais ben calado, introvertido, retraído e xulgamos o que hoxe é coma se iso indicase o futuro.
Estamos a ver o que hoxe é, non vemos o que será o mañá, o presente non sempre determina o mañá.
As mareas podemos controlalas, saber cando é a alta e a baixa, pero a persoa é un ser pensante, cheo de ansias, con capacidade de decidir.
“Eu son eu e as miñas circunstancias” José Ortega e Gasset.
Entón cambian as circunstancias da vida e velaquí que aquel neno tímido e retraído, hoxe é un empresario ou un actor de cinema, ou un político, cansado de dircursear en público.
Miramos, pero non vemos, isto que digo podemos observalo e se facemos memoria vemos o que eran e o que son, quen pensaría que aquel mozo ou aquela rapariga que se poñía vermello ao falar é hoxe quen admiro, pola súa valentía de superación.
Xa vemos aquel oviño insignificante, hoxe é esa bela bolboreta que nos chama a atención.
A vida, como as moedas ou as follas das árbores ten dúas faces, anverso e reverso, mentres vemos unha non podemos ver a outra, ou si, hai persoas que teñen o don ou a calidade de mirar o horizonte e esperar.
Porque non é o que es, senón o que serás. E es sendo.
Es o que es porque fuches.
Se hoxe é hoxe é porque houbo un onte, e esperamos o mañá.
