O Concello da Pobra do Caramiñal, a través da súa participación na XII Limpeza Simultánea de Praias convocada para estes días pola Asociación para a Defensa Ecolóxica de Galiza (ADEGA), impulsou este venres 6 de outubro unha xeira colectiva de retirada de lixo costeiro, protagonizada por nenas e nenos do termo municipal.
O escenario elixido foi a praia da Lombiña, na mañá deste 6 de outubro. O concelleiro do Medio Ambiente, Xosé Lois Piñeiro, explicou que se optou por dirixir esta acción á comunidade educativa co obxectivo de “concienciar as novas xeracións na loita contra a contaminación mariña, na importancia da preservación das contornas naturais e para facer as crianzas parte activa deste tipo de iniciativas que complementan as sesións de sensibilización que se lles levan aos colexios”.
Así, preto de corenta estudantes da primaria da localidade (a metade do 6.° curso de Primaria do CEP Salustiano Rey Eiras e un grupo do 5.° curso do CEP Pilar Maestú Sierra) participaron nesta xornada de voluntariado ambiental na cal lograron retirar 63 quilogramos de lixo do referido areal, nunha actividade que contou coa colaboración da Protección Civil.
