Na mañá do día deste venres 6 de outubro o Centro de Educación Especial de Amicos (Oleiros, Ribeira) abriu as súas postas para realizar un evento moi especial: a súa II Xornada de Portas Abertas. Con esta actividade a asociación anti-barreiras da nosa comarca quixo “destacar a importancia da inclusión dos estudantes con necesidades especiais no sistema educativo”. En Amicos, engadiron, “esforzámonos por crear un ambiente acolledor e adaptativo para cada estudante”.
Os visitantes puideron obter unha visión completa das instalacións e recursos da asociación barbanzá, incluíndo aulas adaptadas, áreas de terapia e tecnoloxía especializada que apoia a aprendizaxe dos estudantes. Tamén tiveron a oportunidade de coñecer a fondo as instalacións de Amicos, interactuar cos profesionais da entidade e obter información detallada sobre os programas da entidade e comprobar o compromiso e o apoio académico, social e emocional que ofrece a cada estudante.
Algúns dos aspectos destacados na xornada de portas abertas foron:
-A presentación dos programas de educación individualizada. O equipo de profesionais da Educación Especial ensinaron como abordan as necesidades específicas do alumnado.
-Dende o CEEPR explicaron o compromiso coa inclusión, xa que se promove activamente a interacción entre o alumnado de Educación Especial e os seus compañeiros e compañeiras de contornas educativas regulares: “Dende Amicos sabemos que esta inclusión enriquece a experiencia educativa de todas e todos os estudantes e que promove a comprensión e o respecto mutuo”.
-Tamén se deu a coñecer o distintivo Blue School da Unión Europea, grazas o proxecto Re-Mar.
-Por último presentouse o Equipo Badaboom, a iniciativa innovadora que proporciona espazos que promoven a actividade física, o xogo activo, a inclusión (deseñando espazos de xogo accesíbeis para todos e todas independentemente das súas necesidades físicas ou especiais).
Nuria Fernández, coordinadora del centro, comezou expresando o seu profundo agradecemento a todos os visitantes que formaron parte desta xornada “tan importante para nós”. E engadiu: “Sabemos que a Educación Especial é unha responsabilidade importante, e estamos comprometidos a proporcionar o apoio adaptado as distintas necesidades e ofrecendo unha educación inclusiva onde os seus fillos, familiares ou amigos poidan aprender e prosperar na súa vida diaria”.
O equipo de Amicos convidou aos asistentes “á II xornada de portas abertas que realizaremos o próximo día 21 de outubro de 11:30 a 13:00h no Centro Integral Amicos en Comoxo, Boiro”, sinalaron.