A semana pasada presentouse ante os medios de comunicación a programación da XXIV Mostra de Curtas Vila de Noia, cuxa sección oficial desenvolverase entre o 1 e o 11 de novembro. O programa de estreas inclúe a proxección de filmes tan agardados como Amigos hasta la muerte, o debut do galego Javier Veiga, ou a celebración dunha xornada que leva o nome Cousas de aquí e que servirá como escaparate para os traballos locais.
Ademais, farase entrega do Premio Honorífico da Mostra, que este ano será entregado ao actor galego Javier Gutiérrez, gañador de dous premios Goya e natural de Ferrol. Ten protagonizado grandes éxitos (de público e artísticos) do cinema español recente, como por exemplo Durante la tormenta (2018), de Oriol Paulo; Campeones (2018), de Javier Fesser; ou El olivo (2016), de Icíar Bollaín. Tamén protagonizo, entre outras moitas, O descoñecido (2015), do galego Dani de la Torre, rodada na Coruña.
Na presentación dos detalles do festival noiés tamén estivo presente o autor do cartel, Xosé Luis Axeitos.
Máis información (puntual e actualizada) no Facebook do certame.
