O Concello de Dodro está a ultimar os detalles do que é gran evento deportivo destes días na comarca: a XVIII Carreira Pedestre de Lestrobe, que se celebra este xoves 12 de outubro durante a mañá. Ao mesmo tempo que se realizan os últimos preparativos, o Concello volveu solicitar a colaboración da veciñanza “para que todo se realice coa maior seguridade”. Tamén compartiu nas redes o percorrido da carreira e os cortes tráficos previstos “para coñecemento de todas aquelas persoas que poidan verse afectadas”.
Estas son as as indicacións:
Data: xoves 12 de outubro de 2023
Entre as 10.15 e as 14.00 horas pecharase o tráfico de vehículos na rúa Fortunato Cruces (dende O Piñón até o Camiño Vello). Restrínxese a circulación de vehículos estacionados dentro desta zona e no centro da aldea onde se levarán a cabo os circuítos das probas de base.
Ademais, na medida do posíbel facilitaranse pasos selectivos con persoal de Protección Civil. A zona entre o Bar Caprichos e o estacionamento do Centro de Saúde (ambos incluídos) deberá estar libre e despexada, non podendo quedar ningún vehículo aparcado nas beirarrúas entre as 7.00 e as 14.00 horas do 12 de outubro.
O mércores 11 habilitarase o Campo da Festa de Lestrobe para que aqueles que non dispoñan de garaxe poidan aparcar o seu vehículo.
Quen precise máis información pode requirila no número 981 802 532.
