As entidades que integran a Asociación Camiño de Santiago pola ría de Muros e Noia fixeron balance dos éxitos acadados este verán en materia de visitas, percorridos, participación e impresións deixadas nas canles de comunicación e nas redes acerca da comarca. Segundo sinalaron, nestes meses estivais rexistrouse un significativo incremento no número de peregrinos que escollen esta ruta, que visitan a comarca especialmente en grandes grupos organizados e procedentes de distintos puntos de España. Uns visitantes, sinalan, “que destacan a calidade da experiencia como o aspecto diferencial desta ruta de peregrinación con respecto a outros Camiños oficiais”.
En palabras de Teresa Villaverde, alcaldesa de Lousame e presidenta da dita asociación, “estamos rexistrando comentarios moi bos por parte das persoas que nos visitan e son moitos os que anuncian a súa volta ben con outros grupos, ben para descubrir outros tesouros da nosa ría de Muros Noia”.
É o caso, lembra a rexedora, dun grupo organizado procedente de Ronquillo (Sevilla), que “quedou namorado das paisaxes da comarca o pasado mes de agosto, especialmente da Fervenza de Toxosoutos (Lousame)”, e que, segundo avanza Villaverde, “xa anunciaron que organizarán unha segunda visita o ano que vén, posiblemente acompañados por un grupo de marcha nórdica sevillano”.
Outro exemplo foi a visita dun grupo de 25 autocaravanas da sección de A Coruña do Caravaning Club Galicia, que fixeron a súa peregrinación a principios de setembro e que xa anunciaron o seu interese pola versión do Camiño Marítimo da Ría de Muros Noia. “O boca a orella está sendo un dos principais medios de difusión do noso Camiño e do conxunto da oferta turística do xeodestino”, apunta Villaverde Pais, que engade que “o peregrino que realiza o Camiño a Santiago pola ría está máis pendente de desfrutar do propio itinerario e das riquezas gastronómicas, paisaxísticas e culturais que ten que ofrecer cada localidade, que da chegada a Compostela e a obtención dun documento acreditativo”.
De feito, explica, son maioría as persoas que non piden documentación ou credencial algunha e prefiren desfrutar da experiencia, moitos deles incluso adaptando a lonxitude e a duración das etapas aos seus gustos e intereses. “O que máis nos satisfai é que todas as persoas destacan o atractivo do Camiño e as espectaculares paisaxes polas que atravesa, o que referenda o bo traballo conxunto realizado por todos os municipios que compoñen a Asociación de Concellos do Camiño a Santiago pola ría de Muros Noia á hora de delimitar o trazado desta ruta xacobea”, sinala Teresa Villaverde.
