A deste sábado 23 de setembro na ría de Arousa non presaxiaba unha boa xornada para a disputa da segunda etapa da Regata Alca, as miradas dos patróns cravábanse no espello que parecía a ría e a única esperanza eran algúns partes meteorolóxicos que predicían a entrada dun vento do sur (suroeste, duns 7 – 8 nós a partir das 14.00, hora prevista para a saída).
Finalmente, as predicións fixéronse realidade e o vento de bocana que anunciaban entrou, cun lixeiro atraso de 20 minutos o comité de regatas deu a saída, coa frota disposta a realizar o típico percorrido con desmarque e paso obrigado pola Illa de Rúa, para finalizar nas inmediacións da Ostreira.
Con estas condicións os favoritos empezaron a ensinar a popa aos seus rivais e as unidades máis rápidas empezaron a poñer metros polo medio, o Santanas, do RCR Galicia, mostraba o seu impoñente spi dos Peperetes na liña de chegada e impoñíase en tempo real e en compensado sobre os seus perseguidores e deixaba o segundo caixón do podium para o ata o de agora líder Ziralla, do Ro Yacht Club. Terceiro unha xornada máis nesta rifada clase para o Chispetrén do Club Náutico Arousa Norte, organizador da proba.
En ORC B, unha semana máis, absoluto dominio do Mauritania de Ángel Romasanta, do Club Náutico Arousa Norte e na clase ORC C, outro pau no marcador do Fixius, que domina o seu grupo con man de ferro, segundo posto para o Orlando, que volveu gañar o seu duelo particular fronte ao ribeirense Galopín.
A seguinte proba da Regata Alca será o próximo 7 de outubro.
