O concello de Ribeira adxudicou hoxe a obra para o saneamento de Campelos (Olveira) cun presuposto de licitación de 216.055,11 euros. No lugar de Campelos, na parroquia de Olveira, non existe actualmente rede de saneamento. Para proporcionar este servizo á veciñanza da zona proxectouse a instalación de 1.295,00 metros de colector e un bombeo que impulsará as augas ata a súa conexión coa rede xeral.
O investimento foi incluído no Plan Provincial de Cooperación ás Obras e Servizos de Competencia Municipais e a obra executarase nun prazo de 5 meses. “Dende o Concello seguiremos a traballar para adecuar o saneamento de tódalas parroquias e garantir a saúde de toda a veciñanza. Unha rede de saneamento ben deseñada contribúe tamén á protección do medioambiente, xa que reduce a contaminación do solo” explicou o alcalde Luís Pérez.
