O Concello de Rianxo fixo balance da súa actividade turística nesta tempada alta do verán que vimos de deixar atrás. No reconto faise saber que dende mediados de xuño atendéronse nos puntos de información turística do termo municipal un total de 6.232 persoas. “Esta cifra supón un aumento do 54% con respecto ao ano rexistrado no 2022”, sinalou o Concello no seu informe, engadindo que a maioría das persoas que visitan Rianxo proceden de outros puntos da Península Ibérica, aínda que tamén destacan os visitantes procedentes de Francia, Reino Unido e Italia.
Destaca o aumento de peregrinos que nos últimos meses realizaron o Camiño de Santiago A Orixe, o cal atravesa a Mancomunidade Barbanza Arousa (Rianxo, Boiro, A Pobra do Caramiñal e Ribeira). Rexistráronse un total de 483 peregrinos procedentes sobre todo do sur de España, así como de Francia e Italia.
