Tralo peche en marzo de 2022 a histórica “Cafetería Nordeste” ubicada na ribeirense Rúa Galicia, reabre as súas portas da man de Lorenzo Novo, fillo de Antonio Novo Salgado e sobrino de Pepe Novo Salgado, os responsables do histórico establecemento do que se fixeran cargo en 1964.
O Nordeste era un dos establecementos máis emblemáticos de Ribeira durante décadas, foi dos primeiros bares en contar con televisión o que facía que fora lugar obrigatorio para velas series de televisión como “Bonanza” ou “Los Intocables de Eliot Ness”.
Moitos veciños lembran con agarimo o vello establecemento lugar de encontro para seguir deportes e que cando a única cadea de Tv existente na época, transmitía encontros desde outra parte do mundo abría de madrugada.
Nos últimos anos antes do seu peche a principios deste século o Nordeste era a “Casa dos cóctel” da que o mestre era Antonio, autor de varios libros usado para ensino. Moitos veciños lembran aínda o gaseado ou o tiro, dúas das bebidas de referencia.
O establecemento que foi inaugurado este xoves abriu o público a xornada do venres con gran afluencia de veciños e nostálxicos do vello Nordeste. Os nosos mellores desexos para a nova traxectoria do “Nordeste Xamonería” dirixida por Lorenzo Novo que seguro manterá o éxito da Xamonería O´Tear que durante anos dirixiu no “Callejón de Sinda”.
