Son catro os équidos localizados ata o de agora, mortos a tiros na Serra do Barbanza, por membros da unidade do SEPRONA de Noia, segundo informou a este xornal o servizo de Prensa da Garda Civil da Coruña. A mesma unidade do Servizo de Protección da Natureza (SEPRONA) confirmou que o propietario dos animais mortos denunciou que son seis as égoas e unha poldra as abatidas a tiros. A día de hoxe, mantense aberta a investigación para dar co autor ou autores desta matanza de bestas de pura raza galega que pastorean tradicionalmente en liberdade nas montañas da serra barbanzana conformada polos concellos de Boiro, A Pobra e Porto do Son.
Ao mesmo tempo trabállase na estración dos proxectís que puxeron fin ás vidas dos catro equinos, co obxectivo de poder determinar que tipo de arma ou armas foron empregados nesta matanza que o propietario dos animais, Manuel Blanco, estimou inicialmente en oito égoas (dúas delas ao parecer propiedade da Comunidade de Montes de Baroña) e un poldro (que ben podería ser a poldra atopada da que informa o servizo de prensa da Garda Civil).
Os propietarios da manda de cabalos non atopan unha explicación lóxica ao acontecido, por canto os cabalos nos entraran en leiras de propiedade privada e alí onde foron abatidos polos disparos -dous e tres nalgúns casos- era o territorio no que decote alindaban. Tampouco existen liortas polas propiedades e desavinzas entre titulares de terras e comuneiros de montes ou propietarios dos animais que pastorean libremente e que, en caso de traspasaren a terras privadas, sempre houbo un entedemento entre as partes para lle dar saída aos amaños porque as bestas están dotadas de chips que permiten localizar aos seus donos e atender as reclamacións a que houbera lugar.
Un cazador foi quen trasladou aos amos do gando, o xoves, o achado dos cadáveres destes animais de pura raza galega actualmente en perigo de extinción e que se pretende recuperar. Este é un dos motivos polos que se intensifica a busca dos catro poldros desaparecidos, crías que poderían contribuir en boa medida ao mantemente desa raza cabalar que tanto beneficio leva dadp aos gandeiros da comarca.
