Antes de que remate este ano e coa previsión de que entre en funcionamento durante 2024, a autoridade portuaria da Coruña proxecta instalar no peirao de trasatlánticos o sistema OPS (Onshore Power Supply) que permitirá dotar de subministro eléctrico aos buques, de xeito que estes poidan apagar os seus motores auxiliares durante a sùa estadía no porto.
As obras comezarán antes de fin de ano, co que o peirao será un dos primeiros de España en brindar este servizo que, cada vez máis, é demandado polas navieiras, centro da aposta que emprendeu a industria cruceiristica pola sustentabilidade.
O porto da Coruña, segundo datos dos seus responsables, quintuplicou nos últimos anos a afluencia de cruceiristas, pasando dos 54.000 pasaxeiros (recibidos no ano 2009) aos perto de 300.000 que se esperan este ano.
É o primeiro porto de cruceiros de toda a cornixa cántabro-atlántica, desde Lisboa ata a Bretaña francesa, cun retorno anual á cidade de 25 millóns de euros, en cifras estimadas polo propio sector.
Precisamente este mes de setembro vai baterse o récord histórico mensual de escalas, cun total de 26. Desde primeiros deste ano foron recibidos 81 buques e máis de 200.000 pasaxeiros, e son agardados outros 65 ata final de ano, cifras que se van manter e mesmo incrementar nos vindeiros anos, cos importantes beneficios que isto supón para os sectores turístico e comercial da capital provincial da Coruña.
As cifras e as previsións en relación co movemento portuario na Coruña desde a posta en marcha das instalacións de Langosteira, finalmente se superan con creces e a expensas, agora, da instalación no porto exterior de novas empresas que, malia todo, compre recoñecer que moi poucos agardaban e que, presumiblemente, darán sentido a unha obras faraónicas nas que -todo hai que dicilo- só a autoridade portuaria cría.
Oxalá nos equivoquemos os que agoirabamos outros resultados tanto nunha coma noutra rada.
