Os expertos afirman que o tráfico de drogas e o narcotráfico está en auxe en Galicia, nos últimos tempos. Volve o oeste americano á Galicia tradicional e conservadora. O enriquecemento duns poucos á conta da enfermidade e da pobreza doutros moitos.
Nas últimas semanas incautáronse máis de tres toneladas de droga, en varias embarcacións que tiñan como destino as costas galegas. As entidades veciñais, sociais e de loita contra a droga alzan a súa voz para que as diferentes administracións e autoridades competentes se poñan a traballar, en serio e con valentía, para gañar a batalla á secuela do narcotráfico.
Aínda hai xente que pensa que o tráfico de estupefacientes, a gran escala, beneficia ás economías locais, coa creación de postos de traballo e de riqueza. Moi triste que continúen con esas mentalidades, aínda que é certo de que moitas empresas e negocios foron creados polo diñeiro manchado coa dependencia e mesmo a morte de centenares de inocentes.
Mirando algunhas mansións, grandes palacetes, vehículos de última gama e suntuosas embarcacións recreativas así como as numerosas propiedades inmobiliarias, concentradas nunhas poucas mans, é proba evidente do lucrativo negocio do narcotráfico.
