O Goberno local de Boiro propón para o seu debate e aprobación no pleno da Corporación un convenio coa Academia Galega de Seguridade Pública para o desenvolvemento de todos os procesos selectivos das prazas de Policía Local e auxiliares do Concello de Boiro.
“Coa sinatura deste convenio preténdese axilizar os procesos selectivos para a cobertura tanto de prazas vacantes no corpo da Policía como dos auxiliares”, recoñeceu o alcalde, José Ramón Romero. O obxectivo deste convenio é que a administración autonómica asuma a convocatoria de prazas vacantes, formación e período de prácticas das distintas categorías do corpo da Policía Local.
“Neste momento dispóñense de prazas vacantes na Policía Local debido a xubilacións e o noso obxectivo é poder cubrilas na maior brevidade posible para así poder prestar un mellor servizo en materia de seguridade á veciñanza”, afirmou o alcalde. A celebración dos procesos selectivos por parte da AGASP facilita “que as prazas se cubran e que os procesos sexan o máis garantistas posíbel”, dixo.
