A concelleira de Medio Ambiente de Ribeira, Antía Alberte e o concelleiro do Mar, Fernando Abraldes, inauguraron este venres 29 de setembro a praia canina de Couso: un espazo de lecer para as mascotas no que facer compatíbel a súa liberdade coa conservación do medio natural e de especies en risco como a píllara das dunas, por exemplo.
Os edís comentaron que dende o 15 de xullo ata o 15 de marzo permitirase durante todo o día o acceso á praia con cans, tendo en conta as restricións que dispón o Plan de Protección da Píllara, ave que aniña nesa zona.
A concelleira de Medio Ambiente recalcou que a permisión de cans no areal de Couso “trátase dunha proba” e que tamén se están a estudar outros areais ribeirenses, aínda que “moitos deles teñen boa parte da súa superficie incluída dentro do Plan de Conservación da Píllara das Dunas en Galicia”. Asemade, dende o Concello sinalan que os donos dos animais terán a obriga legal de recoller os excrementos que depositen nas vías e espazos públicos.
