O Concello de Boiro, a través da Concellería de Servizos Sociais, convoca unha nova edición do Distintivo Benestar Social, uns premios que teñen como finalidade recoñecer o traballo solidario e de voluntariado no municipio. A primeira edición realizouse no ano 2022 e este ano inclúese unha nova categoría, o galardón á Superación e o exemplo.
O Distintivo Benestar Social do Concello de Boiro que celebra este ano a súa segunda edición nace da idea conxunta e da necesidade de agradecer o labor de persoas, entidades ou empresas que fan un traballo desinteresado á vez que se incentiva o voluntariado. Nesta edición vaise facer entrega dun total de seis galardóns: Entidade Social, Voluntariado, Sector Empresarial, Inclusión Social, Méritos Extraordinarios e Superación e Exemplo.
“Consolidamos estes distintivos, un recoñecemento público aos que traballan polos demais”, afirmou o concelleiro de Política Social, Raúl Treus, quen recoñeceu que “non foi sinxelo escoller aos galardoados, o que pon de manifesto que Boiro é unha potencia deportiva, cultural e, cada vez máis, tamén social”.
