Este xoves 14 de setembro foi unha día completo de actividade para as persoas que están a participar no Obradoiro de Emprego Tahume, edición VIII, impulsado polos Concellos de Porto do Son e Ribeira para fomentar a formación laboral e a empregabilidade da cidadanía dos dos municipios. En primeiro lugar, puideron mergullarse no mundo da apicultura e na gastronomía vinculada ao mel da man de Beatriz Rios Cebreiros, técnica do Consello Regulador Mel de Galicia, que compartiu os seus coñecementos e a súa experiencia coas alumnas e alumnos de Tahume e tamén co profesorado, culminando cunha cata a charla sobre os beneficios e posibilidades do mel galego. En segundo lugar participaron nunha actividade formativa coa Fundación Ronsel, que lles mostrou as bases da empregabilidade, o emprendemento e os recursos existentes na nosa contorna xeográfica. De feito, a Fundación Ronsel é unha entidade con sedes na Coruña e Santiago que traballa “co obxectivo de facilitar a ocupabilidade das persoas”.
Como dixemos, o Obradoiro de Emprego Tahume vén da man dos Concellos de Porto do Son e Ribeira. As dúas especialidades activas da oitava edición de Tahume (aparellos de pesca, por unha banda, e cociña, pola outra) comezaron a súa andaina o pasado 3 de outubro, sendo a súa finalidade favorecer a inserción laboral das persoas desempregadas dos dous municipios (Ribeira e Porto do Son) a través de formación especializada, avanzada e dunha índole marcadamente práctica, poñendo o foco na mocidade local. Un total de vinte alumnos e alumnas participan nesta convocatoria, unha edición dual con dúas especialidades distintas: por unha banda operacións básicas de cociña e pastelería e, pola outra, confección e montaxe de artes e aparellos.
