Na mañá deste xoves 7 de setembro, celebráronse no Viveiro de Empresas de Porto do Son as Xornadas de Emprego do Certificado de Confección e Montaxe de Artes. Foi un evento para poñer en contacto ao alumnado do Obradoiro de Emprego Tahume, impulsado polos Concellos de Porto do Son e Ribeira, cas e cos profesionais do sector pesqueiro e marisqueiro, con vistas a futuras contratacións.
Na cita participaron o alcalde sonense, Luis Oujo, e mailos concelleiros de Mar e Sanidade de Ribeira, Fernando Abraldes e Juan Luis Furones, que acompañaron ao “equipo Tahume” na inauguración das xornadas, animando a ambas partes a aproveitar a ocasión para establecer relacións laborais futuras. “E este é un bo momento para facelo, debido aos beneficios dos novos incentivos á contratación”, sinalaron.
Pola súa banda o alumnado fixo gala dos moitos dos coñecementos teóricos e prácticos aprendidos a través dunha moi traballada exposición de redes e aparellos de pesca, acompañada duns entremeses deseñados para a ocasión polas súas compañeiras e polos seus compañeiros do Certificado de Cociña (tamén participantes do Obradoiro Tahume).
Os Concellos agradeceron a participación nas xornadas de representantes do Manilo, do Grupo Pesquero Orellán e da Sociedade Cooperativa del Mar Santa Eugenia da zona de Ribeira (por Ribeira); e do Ansia e Arela, do Amura, do Titán e da Asociación de Redeiras Porto do Son (polo Son).
Como dixemos, o Obradoiro de Emprego Tahume vén da man dos Concellos de Porto do Son e Ribeira. As dúas especialidades activas da oitava edición de Tahume (aparellos de pesca, por unha banda, e cociña, pola outra) comezaron a súa andaina o pasado 3 de outubro, sendo a súa finalidade favorecer a inserción laboral das persoas desempregadas dos dous municipios (Ribeira e Porto do Son) a través de formación especializada, avanzada e dunha índole marcadamente práctica, poñendo o foco na mocidade local. Un total de vinte alumnos e alumnas participan nesta convocatoria, unha edición dual con dúas especialidades distintas: por unha banda operacións básicas de cociña e pastelería e, pola outra, confección e montaxe de artes e aparellos.
