A concelleira de Cultura, Antía Alberte, presentou este venres 8 de setembro unha nova edición da Mostra de Teatro de Ribeira. As funcións están recomendadas para maiores de 16 anos e os espectáculos seleccionados son obras de compañías profesionais de recoñecido prestixio como Sarabela Teatro, Excéntricas, A Panadaría e Malasombra producións; e actores e actrices cunha traxectoria destacada como Luis Iglesia, Camila Bossa, Manuel Manquiña, Victor Mosqueira, Marcos Orsi, Areta Bolado entre outras e outros.
“O principal obxectivo desta programación é o de achegar aos nosos veciños e veciñas unha completa escolma de espectáculos que poñen en valor as creacións artísticas das compañías e grupos galegos e que ao mesmo tempo sexa un escaparate das propostas máis recentes de cada unha delas, facendo accesíbel as artes escénicas á poboación sen necesidade de ter que trasladarse ás grandes capitais.” explicou.
O cartaz atende a tódolos xéneros, e a edición terá un broche de ouro especial, pois o peche da mostra correrá a cargo do Grupo Municipal de Teatro de Ribeira co espectáculo Criaturas.
Poderase adquirir un bono por importe de 25 € que dará dereito a asistir a todas as funcións da mostra a excepción da obra do Grupo Municipal de Teatro, pois esta última será aberta a toda a cidadanía con carácter gratuíto. Nas próximas semanas informarase do procedemento para poder asistir a esta representación así como dos detalles deste espectáculo.
Os bonos poderanse adquirir dende o vindeiro luns día 18 de setembro na Casa do Concello de luns a venres de 9:30 a 14:00 h. Cada semana poranse á venda as entradas individuais para cada un dos espectáculos por un prezo de 4€.
Todas as funcións serán os venres ás 21.15 no Auditorio Municipal. A axenda comeza o 6 de outubro con Arte sen guión, de Galeato, e prosegue o día 13 do mesmo mes con Todo nunha noite, de Abismo Caracol, o día 20 con Arraianos (Sarabela Teatro) e o 27 con Molto Barroco (Píscore Teatro). Novembro comezará da man do dramaturgo local Quico Cadaval, cuxa compañía (Excéntricas) representará O Auto de Castromil. O 10 de novembro representarase Unha comedia imprevista, o 17 Feminíssimas (De STE Xeito Producións) e o 24 con As que limpan (A Panadaría). A mostra rematará con Testosterona de Malasombra (o 1 de decembro) e con Criaturas (Grupo Municipal de Teatro de Ribeira), o 8 de decembro.
