O monte Iroite, na Serra do Barbanza, acolleu o venres pasado unha xornada de plantación de árbores autóctonas. Foi ao abeiro do Proxecto Bosque-Defensa de Iberdrola e Ministerio de Defensa de España, que contouse coa colaboración activa da Ecobrigada da asociación Amicos, entidade da nosa comarca centrada na plena inclusión das persoas con diversidades funcionais e cognitivas. A xeira de traballo desenvolveuse na base Escuadrón de Vixilancia Aérea EVA 10, que ampliou a súa masa arbórea en máis de 7.000 unidades.
O programa Bosque-Defensa Iberdrola incrementou deste xeito o bosque da EVA de Iroite, con dez hectáreas de foresta no perímetro do Acuartelamento Aéreo de Barbanza e nos límites dos concellos de Boiro, Lousame e Porto do Son. O obxectivo é facer fronte “á perda de biodiversidade e ao quecemento global e ás súas consecuencias”.
A plantación incluíu acivros, carballos, érbedos, ameneiros, bidueiras, cerdeiras, sobreiras, castiñeiros e estripeiros. O bosque formará un conxunto de especies frondosas que “pola súa natureza creará ademais un ecosistema propicio para a recolonización de distintas especies de fauna”, explicaron dende Iberdrola, lembrando que ao abeiro deste proxecto traballan 18 ecobrigadistas. O seu labor proseguirá ao longo de 2 anos para o seu mantemento.
Este proxecto conta coa colaboración dos concellos implicados.
