Que está a pasar nalgunhas residencias de maiores de Galicia? Por que hai tanto medo aos labores inspectores? Teñen algo que ocultar? Seica non se cumpren cos pregos de condicións, os protocolos e demais lexislación vixente? O peor de todo é que sexa a propia Xunta de Galicia a que presuntamente obstaculice a eficacia dos labores de inspección nas residencias de maiores, segundo denuncian publicamente desde a Asociación de Inspectores dos Servizos Sociais (AGISS).
Os inspectores, que son funcionarios públicos, quéixanse de que a Consellería de Política Social da Xunta de Galicia “filtra” a algunhas residencias de maiores os días de visita dos inspectores e por conseguinte non se está a garantir a máxima confidencialidade da propia actuación inspectora. É evidente de que hai temor ante as posibles irregularidades e ilegalidades nas que se poidan estar a incorrer en certas residencias de maiores.
As denuncias públicas dos propios inspectores da asociación galega tamén constataron que nas eleccións anteriores “persoas con posible capacidade modificada entregaban o voto ao funcionario de Correos en presenza do persoal responsable dos centros de maiores”.
