Os rapaces e rapazas do Campamento Concilia Verán 2023 visitaron na mañá deste xoves 17 de agosto a Casa Consistorial de Boiro para coñecer o funcionamento do Concello e trasladar ao alcalde as súas demandas. O rexedor, José Ramón Romero, xunto con outros concelleiros do Goberno local, explicáronlles o seu traballo e atenderon as demandas dos rapaces e rapazas relativas ás melloras nas distintas parroquias.
A rapazada procedía do campamento municipal que se está a desenvolver esta tempada en Cespón, Abanqueiro e Cabo de Cruz. Os rapaces e rapazas tiveron oportunidade de visitar o Salón de Plenos e coñecer cales son as funcións do alcalde e os concelleiros e concelleiras. Ademais, puideron trasladar ao Goberno local demandas das parroquias como son a mellora dos parques infantís e outras cuestións relativas á seguridade viaria e dos centros de ensino.
O campamento está dirixido a nenos e nenas de entre 3 e 12 aos escolarizados e ten como obxectivo facilitar ás familias un recurso de conciliación con horarios flexíbeis durante a época estival. Os rapaces e rapazas desenvolven actividades baseadas en técnicas de intervención participativas e activas coas que se fomenta a creatividade e os valores do respecto e solidariedade con enfoques non sexistas e planificadas segundo as idades e necesidades socioeducativas.
