A subdelegada do Goberno na Coruña, María Rivas, achegouse este mércores 2 de agosto ata a Comisaría de Lonzas (A Coruña), para dar a benvida a 15 axentes de Policía Nacional, 11 homes e 4 mulleres, que durante once meses desenvolverán o seu período de prácticas en diferentes unidades. No que atinxe ao total da provincia hai 41 axentes repartidos e repartidas entre as comisarías: 16 en Santiago; 6 en Ferrol-Narón e 4 en Ribeira.
Ademais dos axentes en prácticas, tamén se incorporan a Lonzas 6 axentes, 4 homes e 2 mulleres, que finalizarán aquí o seu período de formación como inspectores e inspectoras para acceder á escala executiva. No total da provincia son 11 os inspectores alumnos e alumnas que optan á súa incorporación á escala executiva.
O módulo de prácticas é a última fase do proceso selectivo para formar parte do Corpo Nacional de Policía logo de superar as probas da oposición e o curso selectivo na Escola Nacional de Policía de Ávila. Ao longo deste período os e as policías terán unha aprendizaxe práctica coa que obterán o nivel de profesionalización requirido para o desenvolvemento das funcións propias de policía.
Durante este tempo prestarán servizos en diferentes brigadas de Seguridade Cidadá, Policía Xudicial, Estranxeiría e Fronteiras, Policía Científica e Información así como na Oficina de Denuncias
Ademais de darlles a benvida, a subdelegada felicitou as novas e novos axentes “por ter chegado ata aquí e ter superado unhas probas tan esixentes e selectivas como as da Escola de Ávila”.
María Rivas fixo fincapé en que durante estes meses, o seu traballo contribuirá a resolver infraccións, atender incidencias e realizar un servizos público esencial dende a responsabilidade e o compromiso.
A subdelegada salientou tamén a importancia da incorporación da muller ás Forzas e Corpos de Seguridade e lembrou que esta promoción chega xa un 32% de mulleres.
