O Concello de Dodro vai estrear este ano un novo servizo para facilitar a actividade laboral das nais e os pais nesta recta final do verán. En concreto, convocou por primeira vez o Concilia Setembro, para “que as familias teñan a oportunidade de agardar o comezo do curso coa tranquilidade que se merecen”, sinalaron dende o Concello. A iniciativa complementa as actividades e o servizo da Escola de Verán-2023, composta de 4 quendas e 60 prazas de xeito completamente de balde para as familias. Este programa esténdese agora cunha quenda extra, a do Concilia Setembro, tamén sen custo. Este novos servizo cubrirá os días comprendidos entre o 1 e o 8 de setembro. Focalizará a súa actividade no Pavillón Polideportivo Municipal.
