O Concello de Boiro, dadas “as faltas de presión que se están a suceder no abastecemento de auga”, recomenda “o uso responsable da auga municipal evitando os regos de xardíns ou fincas agrícolas e baldeos co subministro da traída”.
Os servizos técnicos municipais alertaron nos últimos días do baixo nivel dos depósitos e a falta de presión, que se debe, en palabras do Concello, “a un consumo excesivo por parte da veciñanza derivado de baldeos, rego en xardíns e acometidas non autorizadas”. É por iso que se recomenda facer “un uso responsábel evitando o consumo excesivo da auga da traída municipal”.
Con estas medidas búscase minimizar os efectos que a falta de auga pode provocar no abastecemento municipal, polo que se levará a cabo un maior control da posible existencia de acometidas non autorizadas para evitar o corte da subministración en determinados horarios.
